Gikabutyag nga nangayo ang gobyerno sa Estados Unidos ug extradition batok kang Pastor Apollo Quiboloy, ang founder sa Kingdom of Jesus Christ. Kini human sa pormal nga pagpasa sa Department of Justice sa mga dokumento ngadto sa US government, sumala sa Philippine Ambassador to the United States Jose Manuel “Babe” Romualdez. Gikasayuran nga sukad pa niadtong Hunyo gihangyo na sa US ang maong extradition request.
Nasayrang gilambigit si Quiboloy sa kaso sa human trafficking ug visa fraud. Sumala sa mga imbestigasyon, adunay mga miyembro sa simbahan nga gipadala sa Estados Unidos uban sa mga peke nga visa. Gipasanginlan usab siya nga nagpangayo ug donasyon alang sa usa kuno ka charity apan gigamit kini alang sa magarbong panginabuhi.
Kung maaprubahan ang extradition request, ang duha ka contracting parties magkauyon sa takdang oras ug lugar sa pagsurender sa akusado. Kini nga lakang gilauman nga maghatag ug klaro nga direksyon sa pag-atubang sa kaso batok kang Quiboloy sa sulod sa korte sa Estados Unidos.
