Sa iyang unang Christmas Urbi et Orbi, gibutyag ni Pope Leo XIV nga ang kinatibuk-an nga responsibilidad sa kalibutan mao ang yawe sa kalinaw.
Sa iyang mensahe didto sa St. Peter’s Square atol sa adlaw sa pasko, atubangan sa dul-an 26,000 ka mga tawo, walo ka bulan human siya mapili isip Papa, iyang gipunting ang pag-antos sa Gaza ug Yemen, ingon man ang kahimtang sa mga refugee ug migrante.
Gikan sa sentral nga balkonahe sa basilica, gihisgutan sa Papa ang “Wildpeace” ni Yehuda Amichai, diin iyang gitandi ang ceasefire sa mas lawom nga kalinaw nga nagagikan sa pagbuntog sa panagbangi.
Gikanayon niini nga ang pag-ila sa kaugalingong kakulangan ug ang pagtabang sa mga huyang makahimo og kausaban sa kalibutan, subay sa Kristohanong pagtuo nga si Kristo mao ang “atong kalinaw.”
Nagpahayag usab siya og suporta sa mga nag-atubang sa kalisod, lakip ang mga taga-Gaza, mga Yemeni, migrante, mga walay trabaho, mga trabahador nga ginapahimuslan, ug mga binilanggo.
Gitimbaya usab niya ang mga Kristiyano, ilabi na sa Tungang Sidlakan, ug gihisgutan ang iyang pagbisita sa Turkey ug Lebanon.
Gipangamuyo sa Papa ang hustisya, kalinaw, ug kalig-on sa Lebanon, Palestine, Israel, Syria, ug Ukraine, samtang gihagit ang dayalogo ug ang pagtapos sa panag-away.
Mihangyo usab siya alang sa kalinaw sa Sudan, South Sudan, Mali, Burkina Faso, Democratic Republic of Congo, Haiti, ug Myanmar, diin nagpadayon ang mga panagbangi, kawalay hustisya, kawalay kalig-on sa politika, paglutos sa relihiyon, ug terorismo.
Samtang sa laing bahin gipahinumdoman usab niini ang mga sumusunod nga ang pagtabang sa mga kabus usa ka mahinungdanong bahin sa pagtuo.
Matud pa sa Santo Papa, ang istorya sa pagkatawo ni Hesus sa pasungan tungod sa kakulang sa lawak angay magpahinumdom nga ang pagbalibad sa mga nanginahanglan susama ra sa pagsalikway sa Dios mismo.
Gibutyag usab niya nga walay luna ang Dios dinhi sa kalibutan kon ang mga tawo walay kasingkasing alang sa ilang isigkatawo ug sa mga estranghero.
