Gilimod sa mga abogado sa United People’s Initiative (UPI) kagahapong adlawa ang pamahayag sa Armed Forces of the Philippines (AFP) nga adunay langyaw sumala pa nga grupo nga nagpondo sa ilang anti-corruption rallies sa EDSA.
Sa usa ka pahayag nga gipagawas, gibutyag sa UPI nga walay basehan ang maong alegasyon ug tinguha lamang kini nga libogon ang publiko.
Gibatikos usab nila ang militar tungod bisan pa kuno sa bilyon-bilyong intelligence funds, wala kini makahatag og bisan unsang dokumento, bank records, foreign actors, o validated intelligence report nga mopamatood sa ilang pasangil.
Gihangyo sa UPI ang AFP nga undangon ang pagpanghatag og mga hunahuna-hunahuna ug dili beripikadong impormasyon.
Niadtong Martes, si acting AFP spokesperson Rear Adm. Roy Vincent Trinidad mibutyag nga posible matud nga adunay “foreign groups” nga nagpondo sa dako nga panagtigum, kun diin daghang kahon sa pagkaon ug tubig ang gipanghatag sa mga mitambong.
Napahunong ang tulo ka adlaw nga rally human gidid-an sa Quezon City government ang permit alang sa katapusan nga adlaw, tungod kuno sa mga pamahayag sa pipila ka pagtisipante nga adunay bahid kuno sa sedisyon.
