DAVAO CITY – Gihulat na lamang karon sa resulta sa water sample nga gipailalom sa test sa Department of Health (DOH) gikan sa balon sa Purok 10 Sitio Balon Tigatto Buhangin ning dakbayan nga gitudlong hinungdan sa diarrhea sa pipila ka mga residente sa lugar diin upat na karon ang namatay kalakip na ang purok lider samtang ang uban padayon pa karon nga gitambalan.
Kahinumduman nga nadugang karon sa mga nakutloan sa kinabuhi ang usa ka Flor Pamat, ang inahan sa unang namatay nga si Jesus Olarte.
Gikanayong gikan sa bomba nga anaa sa nahisgutan nga lugar ang tubig nga gina-inom sa mga residente hinungdan nga temporaryo una nga gihunong karon ang pagkalos human ang maong insidente.
Gikanayong kini ang unang higayon nga nakasinate ug diarrhea ang mga residente sa lugar bisan nga dugay na sila nga nagakuha ug tubig mainom niini.
Temporaryo sumala pa nga suplayan ug tubig ang nahisgutan nga dapit ilabi na nga wala na matud pay laing lugar diin sila mamahimong makakuha ug tubig ma-inom.
Una ng gibutyag ni Zafiro Millana, sanitation inspection sa City Health Office (CHO) nga posibleng na-kontamina ang tubig sanglit duol lamang kini sa banyo ug sa babuyan.
