Patay ang 4 ka mga myembero sa pamilya human sa nahitabong pagdahili sa yuta sa Upper Salazar, Brgy. Central, Mati City, Davao Oriental kaganihang buntag.
Kini ang gikumpirma ni Office of Civil Defense 11 Director Ednar Dayanghirang nga nakabsan sa kinabuhi ang mga biktima human sa nahitabong landslide gumikan sa nagbuntag nga ulan sa maong syudad.
Subay sa taho gikan sa mga otoridad, ang 4 ka mga biktima gilangkiban sa usa ka amahan, inahan ug duha ka babaeng anak niini.
Ang mga biktima nahaw-as atol sa search and rescue operations sa lugar diin nahitabo ang pagdahili sa yuta.
Nasayran nga pasado alas Siete kaganihang buntag nahitabo ang insidente nga gilayon usab nga girespondehan sa mga rescuers.
Gisulayan pa og pagdala sa ospital ang tulo ka laing mga biktima apan wala na kini masalbar pa sa mga doktor.
Giila ang mga biktima nga sila 1. Habib-Lagbawan Anting (Lalaki) 2. Nhor Habiba Bantao Anting 13-anyos (Babae) 3. Thahani Bantao Anting 5 -anyos (Babae) ug 4.Kharen Bantao Anting, 39-anyos (Babae).
Samtang sa laing bahin, naghatod usab og kabalaka ngadto sa mga residente ang nahitabong pagdahili sa yuta gumikan sa nagpadayon pa ang mga pag-ulan karong panahuna.
Kahinumduman nga sukad pa sa nakalabay nga adlaw, nakasinati na og mga pag-ulan ang nasampit nga syudad ug pipila ka bahin sa rehiyon tungod sa Shearline nga miresulta usab kini sa mga pagbaha sa pipila ka mga lugar dinhi sa rehiyon.
