DAVAO CITY – Usa ka drug den sa Purok 2, Barangay Mabuhay, Bansalan, Davao del Sur ang gironda sa mga sakop sa PDEA Regional Office XI-Davao del Sur Provincial Office, Davao del Sur Police Provincial Office, 1104th Regional Mobile Force Battalion ug Bansalan Municipal Police Station sa miaging adlaw.
Nasakpan ang suspek nga si Felimon Llorando alyas Mon, 60 anyos, ug lumulupyo sa maong dapit, nga gibaligyaan ang poseur buyer ug usa ka sachet sa gidudahang shabu nga nagkantidad ug P1,000.
Samtang nasakpan sab sulod sa drug den ang tulo ka mga tawo nga nagpahigayon ug shabu session nga sila Rolando Hocamis Jr., Romeo Pantonial ug Rudy Pedrajas.
Nakuha sab gikan sa ilang disposisyon ang unom ka pakete sa gituohang shabu nga gibanabanang nasa dose gramos ang gibughaton ug mubalor sa P180,000 ang kantidad.
Nasutang nadakpan ug nakagawas na kaniadto sila Llorando ug Pantional sa susamang kaso apan nibalik sila sa maong binuhatan. Silang tanan karon tingkagol na sa prisohan nga mapasakahan ug kasong paglapas sa Republic Act 9165 kon Comprehensive Dangerous Drugs Act of 2002.
VIA || Bombo LJ Florendo
