DAVAO CITY – Malampuson nga naluwas ang upat ka mga indibidwal sa grabe nga pagbaha samtang anaa ang mga nahisgutan sa tunga nga bahin sa kasapaan.
Sumala sa Provincial Disaster Risk Reduction and Management Office (PDRRMO), naligo sa Bitan-agan River sa Barangay Don Enrique Lopez, Mati City ang mga residente nga nailang sila si Liza Castillo, 33 anyos; Cherry Mae Casamiro, 19 anyos; Jumaira Lamudok, 11 anyos; ug Ace Budta, 12 anyos.
Apan kalit na lamang sumala pa nga misaka ang tubig gumikan sa walay undan nga pag-ulan nga hatud sa localized thunderstorm.
Gilayon sab nga nakahawa ang mga nahisgutan sa sapa hinungdan nga naabtan sa kusog nga pagbaha apan swerte nga nakapatong ang mga nahisgutan sa natumba nga punoan sa lubi nga una ng giigo sa Bagyong Crising.
Sumala pa kang Shandeo Morales, miyembro sa CDRRMO-Mati, gilayon sab nga miresponde ang mga personahe sa Barangay Disaster Risk Reduction and Management Council ug disaster volunteer group nga BRACES ug malampuson nga naluwas ang mga residente human ang halos usa ka oras.
Gawas sa nahisgutan nga lugar, apektado sab sa mga pagbaha ang pipila ka lugar sa Davao.
