DAVAO CITY – Sikop sa mga ginsakpan sa Criminal Investigation ang Detection Group (CIDG) Davao city field unit ang 4 ka mga security guard nga nalambigit sa gun running syndicate sa nagkadiayang bahin sa rehiyon. Gikanayon ni Police Major Melgrace Driz – ang labaw nga opisyal sa CIDG Davao city Field Unit nga nasikop ang mga suspect atol sa gihiusang entrapment operation sa Oplan Paglalansag Omega ug Oplan Salikop alas unsi kaganinang udto sa gasoline station sa Barangay Indangan ug sa Bamboo state Subdivision sa barangay Sto. Nino Mintal ning dakbayan sa Dabaw.
Giila ang mga suspect nga sila Sario Tamay Butanlog – ang lider sa Butanlog Crime Group, ug mga sakop niini nga sila Anythony Anib Corpus ug Alfie Tadiaman Doctor nga nasikop sa Indangan area, ug si Victor Sales Panerio nga nasikop usab sa Mintal area ning syudad.
Nakuha gikan sa ilang posisyon ang mga mosunod: 1 – 9mm caliber pistol; 1 – magazine sa 9mm pistol nga adunay 5 ka mga bala, 2 – ka .38 kalibre nga revolver nga walay serial number, 9 ka mga bala sa nahisgutang armas ug mga Bodle money.
Dugang gikumpirma ni Driz nga ang Butanlog Criminal group ang bag-uhay lamang naila nga nalambigit sa gun running ug pagpayuhot ug illegal nga druga sa syudad sa dabaw ug sa kasikbit nga mga probensiya.
Gikanayon usab ni Driz nga pipila sa mga dinakpan aktibo pa nga nagtrabaho isip security guard sanglit ang usa nag sul-ob pa ug uniporma, ug naggikan usab sa nagkalain-laing mga security agency.
Nasyaran nga nakasentro sa area sa Panabo City ang operasyon sa Butanlog criminal group.
Gipasakaan na usab sumala pa ug tukmang kaso ang 4 ka mga dinakpan ug padayong ginasuta kung aduna pa bay laing mga kaubanan ang mga nahisgutan.
