DAVAO CITY – Nagpadayon karon sa ilang tahas ang ahensiya sa Philippine Drug Enforcement Agency (PDEA) -11 sa pagtutok sa mga barangay sa Davao region ilabi na kadtong gideklara na nga drug free.
Bag-uhay lamang, anaa sa upat ka mga barangay sa probinsiya sa Davao de Oro ang gideklarang drug-cleared sa Regional Oversight Committee Barangay Drug Clearing Program (ROCBDC) sa pagpanguna sa PDEA.
Gilangkuban kini sa upat ka mga barangay sa Anislagan, Barangay Mipangi, New Sibonga, ug Barangay Ogao. Una ng gipahigayon ang seremonya sa Sanitary Function Hall, Nabunturan, Davao de Oro gitambongan sab kini sa uban pa nga mga buhatan sama sa Department of Interior and Local Government (DILG), Police Regional Office 11, Department of Health (DOH), Local Government Unit mga opisyal sa Barangay, ug mga miyembro sa Barangay Anti-Drug Abuse Council sa upat ka nasampit nga barangay.
Kahinumduman nga ubay-ubay na ka mga lugar sa Davao de Oro ang gipangdeklara nga drug free pinasikad sa nahimong monitoring sa PDEA.
Una ng gibutyag sa ahensiya nga dili nila basta-basta nga ideklarang drug free ang usa ka lugar gumikan kay aduna silay mga sumbanan nga angayan tumanon ug ipailalom pa kini sa hugtanon nga mga ebalwasyon.
Usa sa mga basehan nga ginakonsidera ang wala nay presensiya sa illegal nga druga nga namonitor sa usa ka Barangay ug wala nay mga indibidwal nga nalambigit niini.
Gihimo sa PDEA ang maong lakang human nga usa ang pagpakgang sa illegal nga druga sa mga programa ni Pangulong Rodrigo Duterte.
