DAVAO CITY – Wala pa’y grupo nga mi-angkon nga responsible sa pagbusikad sa fragmentation grenade nga miigo sa unom ka mga tawo sa Nabunturan.
Nasayran nga padayon pa nga gi-atiman sa balay tambalanan ang unom ka mga tawo nga nanga-angol sa pagbusikad sa usa ka hand grenade sa Barangay Bocal, Nabunturan, Compostela Valley Province Sabado sa gabii.
Kahinumduman nga tulo sa mga biktima mga bata pa, usa ang batan-on ug duha ang mga hamtong.
Naila ang mga biktima nga sila si Gesavie Mae Aranaido, 9 anyos, Christian Abellana, 8 anyos, Jay-art Javillana, 4, Daisy Pandesigue, 18 anyos, Cecil, 49 ug Catalino Bunol, 40 anyos.
Nasayran gikan kang Police Chief Inspector Melgrace Driz, tigpamaba sa Police Regional Office Eleven pulos mga gagmay nga mga samad lamang ang nahi-aguman sa mga biktima.
Sumala pa kang Driz pinasikad sa ilang imbestigasyon posible nga gipabusikad ang fragmentation grenade nga pinaagi sa M203 riffle grenade.
Sa nahitabo-an sa pagbusikad na-recover sa explosive ordnance technician ang usa ka aluminum shrapnel ug yuta nga dunay gun powder burn.
Dugang pa ni Driz nga ang dapit diin nahitabo ang pagbusikad bypass area sa mga NPA ug sa mga sundalo ug Civilian Volunteers Organization (CVO).
