DAVAO CITY – Unom ka mga binuhing hayop ang gipamusil patay sa mga armadong grupo nga gituohang mga miyembro sa Bangsamoro Islamic Freedom Fighters (BIFF).
Kini ang gibutyag sa North Cotabato Police Provincial Office. Subay sa impormasyon, nahitabo ang insidente alas 3 sa hapon niadtong Biyernes sa Sitio Valencia, Barangay Bualan, Pikit pinaagi sa pagsulod sa mga armadong BIFF dayon gipamusil ang mga gitugway nga baka ug kabaw sa mga residente sa lugar.
Lima sa mga binuhing baka ug usa ka kabaw ang natusak-tusak sa bala hinungdan sa ilang pagkamatay. Dali sab dayong misibat ang nahisgutang mga armado aron nga di maabtan sa mga nagresponde nga mga sakop sa Citizen Armed Forces Geographical Unit (Cafgu) ug Barangay Peacekeeping Action Team (BPAT).
Kahinumdoman nga niadtong miaging adlaw, usa ka sakop sa Cafgu gipatay sab sa mga miyembro sa Bangsamoro Islamic Freedom Fighters (BIFF) nga mao si Rodel Abellanida nga sumala pa nanugway lang usab sa iyang baka.
Samtang, grupo ni Kumander Duren Manampan sa BIFF ang gitudlo nga anaa sa luyo sa pagpatay sa mga binuhing baka sa nahisgutan nga lugar.
