DAVAO CITY – Sa pagsaulog sa Fire Prevention Month karung bulan sa Marso, pahugtan sab sa ahensiya sa Bureau of Fire Protection (BFP)-Davao Region ang ilang kampanya aron nga malikayan ang mga insidente sa sunog.
Apan kagahapong adlawa, ugdaw ang unom ka nga pinuy-anan sa nahitabong sunog sa Santan Street, Sto. Niño, Barangay 5-A, Bankerohan, dakbayan sa Davao gumikan sumala pa sa wala giibot nga saksakanan sa TV ug giingong gihimo na kining lamp shade.
Sumala kang Fire Officer (FO) 2 Ryan King, fire investigator sa Bangoy Fire Station, adunay nagtan-aw ug TV apan wala giibot ang saksakanan nga maoy hinungdan sa pag-over heat.
Mapasalamaton ang nahisgutan gumikan kay wala na milamoy ug daghanan pinuy-anan ang kalayo kini tungod nakiglambigit kanila ang mga residente sa lugar.
Sa kasamtangan, gi-andam na sab sa lokal nga panggamhanan ang ihatag nga hinabang alang sa mga apektadong residente.
Una ng nasayran kang Fire Chief Inspector (FCI) Edgar Tanawan, fire marshal sa Davao City Fire District nga sa nahitabong sunog dinhi sa dakbayan, 70 porsiyento sumala pa niini ang electrical short circuit o problema sa kuryente hinungdan nga kanunay ang ilang pahimangno sa publiko nga kinahanglan likayan ang pag-overload o pang-ibton ang saksakanan sa mga appliances sa higayon nga dili kini gamiton.
