DAVAO CITY – Gisugdan na karong bulana sa Department of Social Welfare and Development Field Office XI ang pagpanghatag sa Unconditional Cash Transfer (UCT) Social Pension cash cards alang sa mga Social Pension beneficiaries sa nagkadaiyang munisipyo sa tibuok Davao Region.
Ang maong cash card nga gikan sa Landbank of the Philippines (LBP), ang mamahimong magamit aron makuha sa mga benepisyaryo ang cash grant nga ihatag ilalom sa programang Unconditional Cash Transfer (UCT).
Ning kasamtangan, gina-verify na sa mga social workers ang mga rekisitos nga gipasa sa mga senior citizen beneficiaries sama sa Enrollment and Claim Form gikan sa LBP nga adunay 2×2 ID picture ug photocopy sa ilang valid ID kung kini ba kumpleto ug mitugma sa nahatag nga masterlist gikan pa niadtong 2018 hangtud 2020 ayha mahatag ang nahisgutang cash card.
Gikumpirma sa ahensya nga mamahimong muduol ang mga senior citizen sa mga barangay o munisipyo kabahin sa gipanaug nga iskedyul sa cash card distribution sa tagsa-tagsa ka mga lugar. Ang UCT usa ka three-year program sa DSWD nga adunay tumong sa pagpanalipod ug pagpaayo sa kinabuhi sa mga kabos ug mahuyang pinaagi sa paghatag og cash subsidy ilalom sa TRAIN Law.
