Nakuha ang unang bulawang medalya ni Justin Kobe Macario alang sa Pilipinas sa 33rd Southeast Asian Games nga nagpadayon karon sa Thailand.
Kini alang sa men’s Taekwondo freestyle poomsae individual event nga gipahigayon sa Fashion Island Hall, sa capital Bangkok. Natala niini ang score nga 8.200 points nga labaw pa sa pambato sa host nation nga si Koedkaew Atchariya nga mitala og 8.100 points ingon man ni Ken Haw Chin sa Malaysia nga duna’y 7.740-points.
Gilauman nga kining unang gold medal sa Pilipinas sa SEA Games 2025, usa kini ka dakong morale boost alang sa Team Philippines.
Si Macario, gikan sa University of Santo Tomas (UST), kinsa nakabawi sa iyang mga naunang kampanya human siya naka-silver lang sa Hanoi 2021 ug bronze medal sa Cambodia 2023.
Kini ang iyang ikatulong pagsalmot sa SEA Games kung diin hingpit niining nakab-ot ang iyahang gipangandoy nga bulawang medalya.
Aminado kini nga lisod ang kompetisyon tungod kay host country ang Thailand, apan iyang gihatag ang tanan aron makuha ang gold.
Ang kadaugan ni Justin Kobe Macario dili lang usa ka kaugalingong kalampusan, apan usa usab kini ka simbolo sa kusog ug determinasyon sa mga Filipino athletes nga nagrepresentar sa nasud sa regional stage.
