DAVAO CITY- Gidagsa og daghanang mga ginikanan ug estudyante ang mga establismento ning dakbayan alang sa ulahing adlaw bago paman ang pag-abri sa klase karong adlawa.
Sumala pa sa pipila ka mga ginikanan nga usa sa mga rason nganong nadugay ang pagpalit mao ang pagpaabot pa sa budget.
Kabahin niini, ubay-ubay ka mga ginikanan na ang nagkabusy sa pag-atiman sa mga gikinahanglan gamit sa ilang mga estudyante kagahapon.
Sa pikas bahin, niabot na sa kapin 1.1 milyon nga mga enrollees ang ilang natala DepEd XI, diin gilangkuban kini sa 560,097 nga mga kalalakin-an ug 555,926 nga kababayen-an.
Sa maong ihap, 379,766 niini ang nagagikan sa Davao City nga adunay 81.11%. Una nang gikabutyag sa tigpamaba sa DepEd XI nga si Jenielito “Dodong” Atillo nga malaumon silang makab-ot karong school year ang 1.5 milyon nga mga estudyante alang sa SY. 2024-2025.
Hinoon, ginahulat pa ning kasamtangan ang kinatibuk-ang ihap sa mga estudyante hilabi pa kadtong mga niapas sa ulahing adlaw sa pagpa-enrol.
