Gitawag ni House Lead Prosecutor Gerville “Jinky Bitrics” Luistro nga dakong kadaugan alang sa katawhang Pilipino ang unang adlaw sa impeachment trial sa Senado, human opisyal nga misugod ang proseso sa pagpanubag sumala sa gipatuman sa Konstitusyon.
Gipahayag ni Luistro atol sa press conference nga gihimo human sa unang adlaw sa pagtaral nga mahinungdanong lakang ang pag abli sa impeachment trial tungod kay napalihok na ang mekanismo sa pagpanubag nga gilatid sa batakang Balaod. Sumala pa kaniya, parehong napadayag sa prosecution ug depensa ang ilang opening statements ug nahisgutan usab ang nagkadaiyang mga isyu nga gilatag atol sa pre-trial conference.
Dugang pa ni Luistro, sugdan na sa Martes sa prosecution panel ang presentasyon sa ilang mga ebidensya isip kabahin sa pormal nga pagpadayon sa impeachment proceedings. Una nga ipresentar sa prosecution panel ang mga ebidensya nga may kalabutan sa unang Artikulo sa Impeachment nga naglangkob sa giingong hulga o pagpanghadlok.
Lakip sa mga nasabutan atol sa unang adlaw sa pagtaral ang pag-ila sa impeachment court sa gisugyot nga han-ay sa prosecution sa ilang pagpresentar sa mga Articles of Impeachment, nga magsilbing giya sa hapsay nga dagan sa tibuok proseso. Sa pagkakaron, nagpadayon ang mga pagpangandam sa duha ka kampo alang sa mosunod nga mga hugna sa impeachment trial. Kahinumduman, ang impeachment trial maoy konstitusyonal nga pamaagi aron hisgutan ug hukman ang mga alegasyon batok sa usa ka opisyal sa gobyerno pinaagi sa Senado nga milingkod isip impeachment court.
