Napakyas ang unang adlaw sa Conclave voting sa pagpili og bag-ong Santo Papa human sa kapin tulo ka oras nga botohan nga gipahigayon sa sulod sa Sistine Chapel sa Vatican.
Gihuptan og dakong paglaum sa tibuok kalibutan ang unang botohan sa College of Cardinals karong tuiga. Apan pagkagabii sa alas-9 nga oras sa Vatican, sa pagbutyag sa tsimenea sa chapel, mitungha ang itom nga aso, timailhan nga wala pay kasabutan sa pagpili sa sunod nga Santo Papa.
Gisuspensohan una ang posibilidad nga dayon nga mapili ang lider sa Simbahang Katoliko gikan sa mga posibleng kandidato nga gilangkuban nila Cardinal Peter Turkson sa Ghana, Cardinal Pietro Parolin ug Cardinal Matteo Zuppi sa Italy, Cardinal Luis Antonio Tagle sa Pilipinas, Cardinal Fridolin Ambongo sa Congo, Cardinal Robert Prevost sa US, Cardinal Peter Erdo sa Hungary, ug Cardinal Pierbattista Pizzaballa sa Italy.
Gipahibalo nga padayon pa ang proseso ug magpadayon ang mga botohan hangtod makab-ot ang 2/3 majority nga boto sa mga cardinal.
Sa tan-aw sa Italian police, kapin 30,000 ka mga tawo ang nagtigom sa St. Peter’s Square, nagpaabot og kabag-ohan ug nag-ampo samtang nagtan-aw sa tsimenea nga maoy timaan sa resulta sa botohan.
Apan gilauman nga sa mosunod nga mga adlaw, mapili na ang labing angay nga mopuli isip Santo Papa sa trono sa Vaticano.
