DAVAO CITY – Dugang 1,881 ka mga establisamento, kalakip na ang mga residential, ang mituman sa Rainwater Harvesting Ordinance sukad sa Enero hangtud na sa Augusto 2018.
Kini ang gikompirma sa Davao City Engineer and Building Office (CEBO) pinaagi kang Cirinia Grace Catubig, Engineer IV, City General Services Offices nga nagpahayag nga ang nag-una nga katuyo-an sa ordinansa nga nagtumong nga matabangan ang environment ug pagkonserba sa limpyo nga tubig.
Sumala pa niya nga mi-lunsad sab sila sa tinuig nga inspeksyon sa commercial o industrial buildings aron nga masuta kung nagdaginot ba ug tubig pinaagi sa Rainwater Catchment System (RCS).
Ang mga residential houses ginatan-aw sab ug gina-require nga mopahiluna ug RCS, apan ang mga residente nga wala’y land title di mamagimo nga pugson nga motamod sa nahisgutan nga ordinansa.
Ang dagko nga mga establisamento sama sa mga mall dinhi sa dakbayan sa Davao mitamod sa nahisgutan nga ordinansa ug ginagamit ang tubig nga ilang natigum gikan sa ulan alang sa paghinlo ug pagbuhos sa comfort room (CR) ug nakita nga mikubos ang galastohan sa nahisgutan nga mga mall.
Ang Enero hangtud sa Desyembre 2017 nga data, nagpakita nga dunay 3,740 ka mga establisamento ug mga balay nga dunay RCS.
Ang bag-ohay pa lamang gitukod nga mga establisamento o mga balay nga kinahanglan pa nga mokuha ug permit kinahanglan nga motamod sa nahisgutan nga ordinansa.
