Gikumpirma sa mga opisyal ug mga agricultural producers sa habagatang bahin sa Ukraine nga nag-atubang sila og dakong problema human nga giatake sila sa daghang ihap sa dulon o locust nga misulong sa ilahang mga umahan.
Matud pa sa mga report, nga ang mga dulon makapahimulos sa taas nga kainit ug makalaglag sa daghang pananom sulod lamang sa pipila ka adlaw.
Gikasubo sab sa mga mag-uuma nga mihinay ang ilang kapasidad sa pagsumpo sa mga insekto, hinungdan nga nagkadako ang kadaot sa ilang tanom sama sa trigo, mais, ug ubang high-value crops.
Gipangayo nila ang tabang sa gobyerno ug internasyonal nga ahensya, tungod kay lisod ang pag-operate sa mga aerial spraying operations gumikan sa kainit sa panahon, kakuwang sa mga kagamitan, ug risgo sa kahimtang sa kalibotan tungod sa padayon nga gubat tali sa Ukraine ug Russia.
Gidugang pa nga usa sa mga rason nga nagpasamot sa maong krisis mao ang kawad-on sa mga natural predators, ilabi na ang mga langgam nga kasagaran moatake sa mga dulon.
Nagkahinay sab ang ilang presensya tungod sa kasaba sa kagubot ug kasamok sa palibot, nga nakapausab sa balanse sa ekosistema.
Gipadayag sab ang mga lokal nga opisyal nga pangitaan og tubag ang maong krisis, diin posibleng makaapekto sa suplay sa pagkaon sa ilang rehiyon, nga naa na daan sa lisod nga kahimtang tungod sa giyera.
Gipaningkamotan karon sa mga awtoridad nga makakita og alternatibong pamaagi sa pagsumpo sa dulon pinaagi sa manwal nga pagpamatay, mga organic insect repellents, ug komunidad nga pagtinabangay.
