DAVAO CITY – Nakapakurat ug nakapalisang sa mga taga-Davao ang duha ka mga fighter jets nga ubos ang paglupad dinhi sa dakbayan sa Davao alas 11:35 kagahapon sa buntag ug kaganinang alas 4:00 sa kaadlawon.
Sumala pa kang Marisol Ibrahim, usa ka magpapatigayon sa Bankerohan ning dakbayan sa Davao nga nagtuo sila nga gubat na, nakuyawan sila kay kadto pa siya nakakita ug susama nga paglupad sa fighter jets nga sa kakusog sa tingog daw gisi-on ang langit.
Subay sa nakuha nga impormasyon ang duha ka mga fighter jets mga brand new FA-50 nga gi-deliver ngadto sa Philippine Air Force sa milabay nga Hwebes, February 22, 2017 sa Clark Air Base, Pampanga.
Gikan sa air base sa Pampanga, ang duha ka mga jets anaa sa ilang test flight kagahapon sa Tactical Operations Group (TOG) 11, Sasa, ning dakbayan sa Davao.
Ang FA-50 dunay katakus alang sa air-to-air ug air-to-surface missiles.
Labihan ka taas karon ang morale sa Philippine Air Force, dugay na sumala pa nila nga gitinguha nga ma-angkon ang susamang kapabilidad.
Sumala pa kang Col. Antonio Francisco, tigpamaba sa Philippine Air Force (PAF) ang AFP ug ang tibuok nasod mapasigarbuhon nga naka-angkon sa nahisgutsan nga matang sab mga fighter jets.
Sumala sa AFP nga ang dugang duha ka mga FA-50s makadugang sa katakus ug kalig-on sa kasundalohan sa pagpakigsangka sa local terrorist groups sa Central Mindanao.
Sa wala pa ang nahisgutan nga duha ka mga bag-o nga jets, ang PAF wala’y fighter jet human nga ang US-designed F-5 fighters gi-retire na niadto pang 2005.
Sa pagkatapus sa 2017, dugang pang unom ka mga fighter jets ang madugang ngadto sa kusog sa PAF.
