DAVAO CITY – Gipadayag sa usa ka magtutudlo ang pipila ka mga rason sa pag-ubos sa kalidad sa creative and critical thinking skills sa mga estudyante subay sab sa nahimong datos nga nahagpat sa Programme for International Student Assessment kon PISA.
Sumala ni Christian Glomar Coronado, usa ka educator nga nakahinabi sa Bombo Radyo Davao, pipila sa mga gitudlong rason niini ang minimal nga paggiya ngadto sa mga kabatan-onan ilabi na sa mga learning competencies sa Language, Mathematics ug Science sa pagbaton og creative pursuits ug ang ubos nga lebel sa pagbaton nila niini.
Gawas sa kawang nga literacy, gipunting sab sa magtutudlo ang ubay-ubay nga recovery gikan sa pandemya ug ang daghanang competencies nga kinahanglang kuptan ilawom sa K-12 curriculum nga matud pa makakumpormiso sa kalidad sa pagtuon sa mga estudyante.
Dugang pa ni Coronado nga ang depedency sa teknolohiya ilabi na sa AI kon artificial intelligence technology ang nakahatag og ubos nga kapasidad sa magtutuon sa pagpangita og saktong impormasyon sa internet. Sa hisgutanang pag-ban sa paggamit og cellphones sa mga klasrum, kinahanglang adunay regulation sa paggamit niini ilabi pa nga magpabiling masaligon sa teknolohiya ang mga estudyante sa ilahang pagtuon.
Gitagi-tagi sab sa magtutudlo ang pipila ka mga nakitang suliran sa sistema sa edukasyon sa nasud sama na lamang sa gagmay nga ihap sa mga klasrum, kakuwang sa mga learning resource sama sa libro, ug ang kalidad sa mga magtutudlo nga sagad nakatutok sa mga administrative tasks inay ang paghatag og taas nga panahon sa pagtudlo.
Sa panan-aw ni Coronado, dili pa matawag nga de-kalidad ang edukasyon sa Pilipinas gumikan sa mga kakulian sa pagtudlo, pasilidad ug sa pag-utilize sa gigamit nga kurikulum apan nanghinaot sab kini nga sa paglabay sa panahon, ilabi na sa implementasyon sa bag-ong Matatag Curriculum sa Department of Education nga subling mahaw-as na gikan sa pinaka-ubos nga ang-ang ang kahanas sa mga estudyante.
