DAVAO CITY – Mipadayag ang pipila ka mga yanong lungsoranon sa ilang pag-uyon sa subling pagbuhi sa Death Penalty sa nasud pinaagi sa pag-apruba sa House Bill 4727.
Hugot ang pag-uyon sa usa ka Alfredo Morado sa pagbanhaw sa silot kamatayon alang sa mga nakahimo ug salaud sa katawhan ug sa katilingban.
Apan matud pa niya, mas maayo unta kung ilakip sa mapahamtangan sa maong silot ang mga kasong murder, rape ug ingon man plunder.
Susama sab ang baruganan ni Nanay Maria kinsa nagkanayon nga pinaagi sa Death Penalty mahunong ang mga kriminal sa paghimo ug salaud tungod sa kahadlok sa kamatayon nga ipahamtang kanila.
Hinuon, bisan miuyon sa silot kamatayon si Tatay Jose, apan nabalaka gihapon siya sa posibleng dautan nga hatud niini hilabi na sab sa mga kabus nga mapahamtangan tungod sa walay katakos nga makakuha ug maayo nga abogado tungod sa kapobrehon.
Posible matud pa nga bisan walay sala ang usa ka kabus apan dili niini mamahimo nga madepensahan ang kaugalingon tungod sa kakulang sa katakos nga makakuha ug mupanalipod kaniya.
