Usa ka U.S.Journalist nga nailhan nga si Jeffrey Goldberg ang aksidenteng naapil sa usa ka group chat diin naghisgot ang mga tag-as nga mga opisyal sa Estados Unidos, lakip na sila U.S. Defense Secretary Pete Hegseth ug U.S. Vice President JD Vance, mahitungod sa umaabot nga airstrike batok sa Houthi rebels sa Yemen.
Gipamatud-an sa White House ang maong security breach karong adlawa(Oras sa US) ug mipadayag nga aksidente lamang nga nadugang ang usa ka numero sa maong chat.
Kahinumduman nga ang airstrike, nga gipahibalo ni U.S. President Donald Trump niadtong Marso 15, adunay detalye nga gipadayag sa chat, sama sa mga target ug gikatakdang oras sa atake. Apan, wala kini gipadayag ni Goldberg sa publiko.
Bisan pa sa maong pagka-leak, gitawag ni Trump ang airstrike nga “very effective.”
Matod sa nagpkaylap nga impormasyon, si U.S. Defense Secretary Hegseth mipadala og detalyadong impormasyon kabahin sa strike, lakip na ang oras sa pagpabusikad sa partikular nga lugar sa Yemen diin nagpondo ang Houthi rebels.
Mihatod kini og kasuko sa mga Democrats, diin gipahayag ni U.S. Senate Minority Leader Chuck Schumer nga kini usa ka paglapas sa military intelligence ug midemanda siya og daliang imbestigasyon.
Samtang, gipakgang usab ni U.S. Senator Jack Reed ang nasampit nga impormasyon ug gitawag ang kakulangon sa pag-amping sa gabinete ni Trump nga usa ka hulga sa seguridad.
