DAVAO CITY – Padayon karon ang imbestigasyon sa kapulisan sa Toril ning dakbayan sa Davao sa nahitabong insedente sa nasampit nga lugar diin siyam ang angol.
Lakip ang menor de-edad sa mga nasamdan human nga nawad-an ug kontrol ang usa ka bongo nga gisubay ang Mc Arthur Highway sa Binugao Toril ning siyudad.
Gimaneho sumala pa sa usa ka Anecio Romero Rupin Jr., hamtung ang pangidaron nga taga-Tuban Sta. Cruz Davao del Sur ang sakyanan.
Sa inisyal nga imbestigasyon sa kapulisan padulong unta ang mga nahisgutan sa Sta. Cruz Davao del Sur apan pag abot nila sa kurbada nga bahin sa maong dalan sa Binugao na dalin-as ang sakyanan hinungdan nga nawad an kini ug kontrol ug natumba sa kalsada.
Dali hinoon nga gidala sa balay tambalanan ang mga sakay niini. Nasayran nga dunay nahulog nga duha ka sako sa mayonnaise gikan sa usa ka wala mailhing truck nga mao usay usa sa mga gilantaw nga hinungdan sa insedente.
Sa karon, anaa na sa luwas nga kahimtang ang mga biktima.
