DAVAO CITY – Naglaum ang Regional Civil Security Unit 11 nga ma-renew ang License to Own and Possess Firearms sa nasa bayte mil ka mga armas dinhi sa Davao Region.
Sumala pa ni Police Colonel Richard Verceles, ang hepe sa RCSU 11, ilang gilauman nga maabot ang renewals nga musobra sa target nga 50% sa 20,251 ka mga unrenewded firearms sa Davao Region una pa man mahitabo ang Barangay ug Sangguniang Kabataan Elections 2023.
Kalabot sab kini sa kampanya batok paggamit og ilegal nga armas panahon sa BSK election.
Sukad pa niadtong bulan sa Abril, nakatala na ang RCSU 11 og average nga 400 ka mga renewed firearms matag simana.
Nagpadayon sab ang kampanyang Oplan Katok aron mapahimangnuan ang mga nanag-iya og armas nga i-renew na kini sa pinakaduol nga opisina sa RCSU 11 sa ubang parte sa rehiyon, partikular na sa bag-uhay lang nga giabling Assistance Center sa usa ka dagkong mall sa Ecoland ning dakbayan.
Sumala pa sa calendar of activities nga gihatag sa COMELEC alang sa muabutay nga BSKE, magsugod ang Gun Ban panahon sa Election Period karong Agusto 28 hangtud Nobyembre 29, ug karong Oktubre 30 na ang gikatakdang piniliay sa barangay.
via || Bombo LJF
