Gibutyag ni Atty. Ahmedsiddique Bravo Dalam, ang Assistant Dean sa College of Law sa University of Mindanao, nga hilabihan gayud sumala pa ang ilahang nabati nga kalipay sa dihang nasayran nila nga adunay usa sa ilahang mga nahaimong estudyante maoy nakakab-ot og anaa sa rank 8 alang sa gipahigayong BAR examination, diin kagahapon adlawa lamang gi-release ang resulta sa maong examination.
Dugang pa niini nga nagapabilin gihapon sumala pa ang integridad sa ilahang eskwelahan, hilabi na nga maghatag ngadto og kahigayonan ngadto sa kadaghanan aron nga mamahimong maayo sa pagtuki sa balaod, pinaagi sa pag bansay niini sa culture of discipline ug culture usab sa pagtinguha aron nga mapalambo niini ang kaugalingon.
Kahinumdumang, kagahapong adlawa gikalipay sa taga University of Mindanao-College of Law bar operations ang pagkahilakip sa ilahang tinun-an nga nahimong kabahin sa top notchers sa gipaguwa nga resulta sa Bar exam karong adlawa.
Lakip sa baynte ka mga top notchers sa Bar Exam ang usa ka bar taker nga gikan sa nasampit nga tulunghaan nga si Jojie Macadine nga nakaangkon ug average nga 83.7450 percent.
Giisip sa pamunuan sa nasampit nga eskwelahan ang kalampusan niini nga usa ka inspirasyon alang sa mga aspiring lawyers.
Giila niini ang pagkugi, dedikasyon, ug ang pagkamaayo mao ang naghatod sa dakong garbo dili lamang sa kaugalingon niini, apan sa kinatibuk-an nga tulunghaan.
