DAVAO CITY – Tulo ka mga tawo ang namatay gumikan sa nasinatiang diarrhea sa Purok 10 Sito Balon, Barangay Tigatto ning dakbayan sa Dabaw.
Giila ang mga namatay nga sila Jesus Olarte, 47 anyos, Jemvie Rafallo, 31 anyos, ug ang purok leader nga si Eduardo Edica, 61 anyos.
Samtang padayon usab nga gitambalan sa Southern Philippines Medical Center ang lain pang 3 usab ka mga residente. Gikanayon ni Liezl Cutamora, usaka registered nurse sa DOH 11 nga gipadala aron motabang sa nahisgutang dapit, niadtong adlaw nga domingo pa nagsugod ang maong sakit sa nahisgutang lugar apan kagahapon pa lamang gireport ngadto kanila.
Sumala ni Cutamora, subay sa report sa Barangay Health Worker ngadto kaniya paspas ang panghitabo gumikan kay wala na makaabot pang buhi sa ospital ang mga biktima nga namatay niadtong Lunes.
Katapusan nga nabugtuan sa iyang kinabuhi ang Purok leader sa nahisgutang dapit kagahapong adlawa.
Sa gihimo nga pagpanubay, 5 ka mga balay ang apektado sa diarrhea diin pito ka mga residente ang biktima.
Sa karon, dili pa makahatag ug tinuod nga hinungdan sa maong panghitabo ang mga health officicials, apan gikanayon ni Cutamora nga posibling gikan sa tubig nga gi-inum sa mga biktima ang hinungdan sa diarrhrea.
Sa pikas bahin, gibutyag usab ni Zafero Vernon Mellana, sanitary inspector sa Davao City Health Office nga subay sa gihimo niining inspection sa 3 ka mga water source sa lugar iyang nasuta nga duol kini sa CR ug sa kulungan ug mga baboy, gawas pa nga adunay mga baki nga nagpundo dinhi.
Nasayran nga nag-una tinubdan sa tubig sa nahisgutang lugar ang bomba ug balon diin didto nila ginakuha ang ilang gina-inum, ginagamit sa pagluto, pag-laba, paghugas ug uban pa.
