DAVAO CITY – Plano karon sa lokal nga kagamhanan nga magdugang ug laing tulo pa ka mga special vaccination sites alang sa mga bata nga nag-edad ug singko hangtud na 11 anyos aron nga mapadali pa ang gipahigayon nga rollout batok covid-19.
Sumala pa kang Dr. Michelle Schlosser, tigpamaba sa COVID-19 Task Force Davao City, ang bag-ong dugang nga sites lauman nga maka-cater ug mga pasyente nga sakop sa nahisgutan nga age group ug muabot sa 269,121.
Ipahimutang matud pa kini sa Almendras Gym sa Quezon Boulevard, San Roque Central Elementary School sa Barrio Obrero sa Poblacion District ug Vicente Hizon Sr. Elementary School sa Barangay Vicente Hizon Sr.
Sa kasamtangan, adunay 25 ka mga operational nga vaccination sites ang siyudad nga alang sa uban nga age groups. Una ng gibutyag ni Schlosser nga nakatala ang task force ug 1,688 ka mga bata sa nahisgutan age group ang nabakunahan ug first dose sa milabay nga Pebrero 17.
Sumala sa Department of Health, ang 0.2 milliliter formulation sa Comirnaty sa Pfizer ang gihatagan ug emergency use authorization alang sa singko hangtud 11 anyos nga adunay higher formulation nga 0.3 mL alang sa uban nga age groups.
