DAVAO CITY – Gisaysay ni Joint Task Force Haribon chief Brig. Gen Gilbert Gapay ang sunod-sunod nga mga engkuwentro nga nahitabo tali sa mga rebeldeng New People’s Army (NPA) ug tropa sa kasundalohan sa tulo ka mga areas sa dakbayan sa Davao nga sakop sa second ug third districts.
Matud pa kang Gapay nga sukad pa niining milabay nga gabii ang ilang pagmonitor sa encounter nga nahitabo sa bisinidad sa Baguio ug Calinan Districts.
Nakaatbang sa sumala pa sa mga kasundalohan ang mga sakop sa Pulang Bagani Command 1 ilalom ni alias Jinggoy ug Pulang Bagani Command 2 ilalom ni alias Lando.
Samtang gi-atake sab kagahpon sa kadlawon sa mga NPA ang military detachment sa Malabog, Paquibato District apan paspas nga nakabalos ang mga kasundalohan hinungdan nga usa ka e NPA ang namatay diin gidala sumala pa sa mga rebelde ang patay’ng lawas niini.
Kagahapong sa udto, gi-atake sa mga rebelde ang civilian community sa Davco pineapple plantation sa Baguio District ug gisunog ang harvester nga iya sa Del Monte Philippines.
Nagtuo si Gapay nga ang pagpangatake sa Davco mamahimong balos sa mga NPA sa ilang napatay nga kaubanan. Gitataw sab sa opisyal nga kagahapong sa hapon, adunay natigayon sab nga engkuwentro sa Lamanan, Calinan tali sa blocking force ug mga miikyas nga mga rebelde.
Subay sa kumpirmasyon sa 3rd Infantry Battalion nga nag-operate sa area, tulo ka mga sundalo ang patay, napulo ang samdon samtang duruha ka mga NPA sab ang napatay.
Sa kasamtangan nagpadayon ang gipahigayon nga pursuit operation sa mga kasundalohan batok sa mga miikyas nga mga rebelde.
