DAVAO CITY – Tulo ka mga anggulo ang gitan-aw karon sa kapolisan sa New Corella Municipal Police Station sa ilang pagsuta sa pagka-ambush patay sa usa ka Rohel Hinay Gozon, 33 anyos, negusyante, sa Purok 8, Barangay Poblacion, New Corella, Davao del Norte.
Sumala pa kang PO3 Harold Mijonda, imbestigador sa nahisgutan nga ambush nga kalakip sa ilang gitan-aw karon ang P2.2 milyones ka pesos nga utang sa biktima sa Pryce Gas, bangi sa yuta, ug ang posibling dakung tawo nga gikabangga sa magpapatigayon.
Kahinumduman nga gawas kang Gozon, patay sab ang kaubanan niini nga sila si Arturo Gozon Cordita Jr., 27; ug usa ka Carlos Padilla Abad. Giingon nga silang tulo padulong na unta sa Tagum City sakay sa Kia Sportage Wagon apan kalit na lamang giatangan sa mga mamumuno dayon gipamusil.
Samtang si Manong Reynaldo Alyod, 60 anyos, kang kinsang balay nahimutang doul sa ambush site namahayag nga una siyang nagtuo nga dunay mga batan-on nga nagpaboto ug piccolo sa ilang dapit mga alas unse sa gabii niadtong Merkules, Enero 10, hinongdan nga iyang gibuyag.
Naka-ambak sa sapa ang tigulang human masayud nga mga armado ang mipusil patay sa mga biktima.
Natahap si Reynaldo Alyod nga Carbine ug M16 armalite rifle ang gigamit sa mga mamumuno sa nahisgutan nga ambus gumikan sa dagku nga mga boto sa armas nga ilang nabati.
Gibuyag sumala pa sa usa sa mga suspek aang kauban nga gusto pa unta nga rapidohon ang mga biktima bisan kung seguro na nga patay na.
