DAVAO CITY – Tulo ka menor de edad ang nasikop human gitudlong nangawat ug motorsiklo sa usa ka police auxillary sa Davao City.
Sigun sa report, nidangop sa San Pedro Police Station 2 ang biktimang si Jhon Christopher Casupot, 32 anyos, usa ka police auxillary ug residente sa Purok 5, Bolton Isla, Brgy. 40-D, ning dakbayan.
Gipahimutang pa ang iyang motor duol sa iyang girentahang boarding house sa dihang napalgan niyang nawala.
Pagpanubay sa kapulisan, unang gitudlo sa biktima ang 17 anyos nga si Arzel Marcellones Lorenzo, nga notadong kawatan ug rugby boy sab sa maong lugar. Apan, pagpangutana kang Lorenzo, gilimod niya ang maong alegasyon.
Sanglit, gipunting niya nga duna pay laing duha ka menor nga nagkawat sa motor sa biktima.
Mao sila Lhendo Olim Siwani, 17 anyos; ug Jimboy Javelosa Lorenzo, 16 anyos, parehong lumulupyo sa Purok 2, Brgy. Tungkalan, Toril, Davao City.
Uban ang Toril Police Station, nagpahigayon dayon ug hot pursuit operation sa Brgy. Tungkalan, Toril aron dakpon ang mga gitudlong suspetsado.
Giendorso na ang duha ka mga dinakpang menor sa Women and Children Protection Desk sa San Pedro Police Station 2 samtang usa ang mag-atubang ug kasong R.A. 6539 kon Anti-Carnapping Act of 1972.
via || Bombo LJ Florendo
