DAVAO CITY – Kabsan sa kinabuhi ang tulo ka magpamilya human nahitabo ang usa ka landslide sa Brgy. Paloc, Maragusan, Davao de Oro, kagahapon sa kaadlawon.
Gikumpirma sa Davao de Oro PDRRMO nga nahilakip sa mga natabunan sa nidahili nga yuta sa maong dapit sila Jesus Emejio, 59-anyos; Lucita Emejio, 58-anyos, ug ang isa nila ka apo nga batang lalaki.
Nasayran nga samtang nangatulog ang mga biktima sa ilahang panimalay nga anaa sa ubos nga bahin sa kalsada, kalit nga nahugmak ang pader human sa pagdahili sa yuta.
Na-retrieve sab sa mga sakop sa MDRRMO ang ilang mga patayng lawas.
Nagpaabot og pahasubo ang lokal nga panggamhanan ngadto sa nabiyaang pamilya sa mga biktima. Nahitabo ang landslide dungan sa kusog nga pag-ulan nga natagamtaman sa maong dapit.
Subay sa taho sa Municipal Disaster Risk Reduction Management Office – Maragusan, bandang alas-5 sa buntag kagahapon dihang nahitabo ang mga landslides sa mga barangay sa Katipunan, Tandik ug Luzvimin nga nakapalisod sa paglatas sa mga sakyanan.
Kahinumdoman nga gipailawom sa Heavy Rainfall Warning No. 6 kon Yellow Warning ang probinsiya sa Davao de Oro tungod sa nasinating pag bundak sa ulan sa probinsya.
via || Bombo LJF
