Nakatala ang Regional Alternative Child Care Office (RACCO) Region 11 og tulo ka mga kaso sa mga foundling o mga batang gi-abandona sa unang bahin sa tuig 2025.
Kini gipadayag ni Jennyluz M. Coma, Social Welfare Officer II sa RACCO 11, nga miabot na sa 24 ka kaso sa bata nga gibiyaan ang ilang nadokumento sa tibuok Davao Region.
Ang pinakabag-o nga kaso, natala niadtong Marso 20, 2025, sa Lanzona Subdivision, Matina, Davao City.
Subay sa Republic Act 11767, ang RACCO maoy gimanduan nga motabang, moprotektar, ug mo-proseso sa legal nga mga dokumento sa mga foundlings aron matagan kini og tukmang pag-atiman ug kahigayunan nga makab-ot ang ilang katungod isip bata.
Gipasabot ni Coma nga ang mga foundling mao ang mga bata nga gibiyaan nga walay birth certificate o bisan unsang legal nga dokumento nga nagpakita sa ilang pagkatawo.
Matod pa sa RACCO 11, bisan pa og adunay mga ginikanan o paryente nga gusto mokuha pag-usab sa kustodiya sa bata, dili kini dali.
Kinahanglan kini og hugot nga assessment ug legal nga proseso aron masiguro ang kaluwasan ug kaayohan sa bata. Sa mga kaso nga adunay mureklamo o muangkon nga paryente, kinahanglan nga ipresentar ang klaro nga ebidensya sa ilang relasyon sa bata, lakip na ang mga dokumento ug evaluation gikan sa buhatan.
Hangtod nga wala pa kini matino, magpabilin sa kustodiya sa gobyerno ang bata.
Gipanghimatuud sa RACCO 11 nga ila gyud paniguroon ang legal ug husto nga proseso aron maprotektahan ang kahimtang sa mga batang gi-abandona ug mahatagan kini og higayon sa mas lig-on nga kaugmaon.
