DAVAO CITY – Nakigpinusilay sa kapulisan ang usa sa nanulis sa drayber sa umbak nga miresulta sa hinanaling kamatayon niini nga natigayon niadtong Miyerkules sa gabii sa Davao-Bukidnon Highway, Purok 13, Quarry, Barangay Tugbok Proper, Tugbok District ning dakbayan.
Subay sa rekord, nailhan ang usa sa suspek nga mao si Hilal Aloyodan Mustapha nga residente sa Marogong, Lanao del Sur.
Saysay sa biktima nga nailhang si Bernardo Tocmo Caminade, 50 anyos, gitalian sa usa ka suspek og nylon ang liog niini, samtang nagngilog usab og manibela ang usa sa suspetsado.
Human sa pagpanulis, gidala usab sa mga suspetsado ang umbak paingon sa Calinan.
Hinoon, gilayong nagpahigayon og hot pursuit operation ang kapulisan nga miresulta sa pagkakaplag sa duha apan inay nga mursurender, nakigpinusilay ang mga suspetsado ngadto sa otoridad.
Ang maong panghitabo misantop sa kamatayon sa usa sa mga tulisan nga nailhang si Hilal Mustapha, samtang ang kauban niini nakasibat sa sagbutan nga bahin ug padayon pa nga ginapangita karon sa kapulisan.
