DAVAO CITY – Gikumpirma sa Davao City Police Office nga anaa na sa upat ka mga indibidwal ang gikatalang patay sa nahitabong pagkahugno sa tulay sa Sitio Kibukak, Brgy. Malamba, Marilog District, Davao City, bandang alas-4:45 sa hapon, adlawng Lunes, Hulyo 24.
Usa sa mga biktima nga nakabsan sa kinabuhi ang giilang si Rolando Bongguyan Abing, 40 anyos trabahante sa Buhusan Construction Company.
Nasayran nga usa kini ka bag-ong tulay ug nahugmak lamang kini gumikan sa mga pag-ulan sa lugar.
Saysay sa Marilog Police, duna’y dalang bakal ang boom truck nga miagi sa maong tulay nga nagresulta sa pagkahugmak niini.
Samtang dunay usa ang nasamdan nga giilang si Meljay Roaring Vero, 21 anyos.
Kasamtangang naglusad og rescue operations aron maluwas ang gituohang anaa sa 10 ka indibiwal nga na-trap sa lugar.
