DAVAO CITY – Okupado karon ang dakbayan sa Davao sa pagdugang pa ug mga Temporary Treatment and Monitoring Facility (TTMF) aron nga maakomodar ang nagpadayon nga pagsaka sa mga natakdan ug covid-19 sa siyudad.
Kahinumduman nga mikabat na karon sa 22 ka mga TTMF ang gi-ablihan karon sa dakbayan samtang dungagan pa sab kini sa siyudad apan gihulat pa lamang ang pag-apruba gikan sa IATF aron hingpit na kini nga mamahimong operational.
Gikanayong anaa sa walo ang nadugang sukad sa milabay nga semana ug duha na lamang niini ang wala naablihan.
Una ng gibutyag ni OIC City Health Office head Dr. Ashley Lopez, nga pinakadako karon nga TTMF’s ang sa A.L. Navarro Elementary ug High School tungod kay adunay kini 500 beds.
Dakong tabang sumala pa kini aron masiguro nga daling madala sa mga pasilidad ang mga nagpositibo sa covid-19 ug aron malikayan ang padayon nga transmission sa kagaw.
Una na sab nga gitino sa buhatan nga bisan sagad sa mga tulonghaan karon ang gihimong TTMF’s, dili sumala pa maapektohan ang padayon nga klase sa mga estudyante partikular na ang pagkuha ug module sa mga ginikanan sanglit aduna sumala pay area diin mamahimo nila kini nga kuhaon nga layo sab sa mga classroom diin gipahimutang ang mga covid-19 positive patient.
Kagahapong adlawa, anaa sa kapin 500 ka mga bag-ong kaso ang natala sa Davao region.
