Nagpahimangno si U.S. President Donald Trump nga adunay grabe nga “consequence” kung dili mosugot si Russian President Vladimir Putin sa kasabutan alang sa kalinaw sa Ukraine. Ang maong pahimangno gibuhat niini sa ilang umaabot nga miting sa Alaska karong Biyernes. Bisan wala niini gisulti ang tukmang lakang, giingon ni Trump nga posible kini maglakip og bag-ong economic sanctions batok sa Russia.
Human sa usa ka virtual meeting uban ni Ukrainian President Volodymyr Zelenskiy ug mga lider sa Europa, gisiguro ni Trump nga dili mahimong adunay kasabutan kabahin sa teritoryo sa Ukraine kung wala ang pagtugot ug partisipasyon sa nasud. Gisuportahan usab sa French President Emmanuel Macron ug German Chancellor Friedrich Merz ang pahayag ni Trump, nga nagpasabot nga kinahanglan dugangan ang pressure sa Russia kung walay positibong resulta ang pag-istorya sa Alaska.
Gipadayag usab ni Zelenskiy nga gigamit lang ni Putin ang hulga sa bag-ong opensiba aron manghadlok sa wala pa magsugod ang summit. Gibarugan sa Ukraine nga dili kini mosugot sa kondisyon sa Russia nga atrasan ang tropa sa upat ka rehiyon ug buhian ang plano nga mosulod sa NATO. Gitutokan sa miting sa Alaska ang paglatid sa dalan para sa direktang dayalogo tali sa tulo ka panig aron maabot ang kalinaw.
