Kapin sa Otso milyones ka mga tawo ang misalmot sa mga protesta sa nagkalain-laing bahin sa United States nga gitawag og “No Kings” protest, diin ilahang gisupak ang mga polisiya ni US Pres. Donald Trump.
Lakip sa ilahang gikondena ang gyera sa Iran, paghugot sa immigration policies, ug ang padayon nga pagsaka sa presyo sa mga palaliton.
Gipahigayon ang mga protesta sa mga dakbayan sama sa Los Angeles, Boston, New York City, Washington, D.C., ug Houston, ug uban pa.
Lakip usab ang Minnesota, diin gihandom ang mga namatay nga sila si Renee Nicole Good ug Alex Pretti nga napusilan sa federal immigration agents.
Misalmot usab sa protesta ang pipila ka mga personalidad sa showbiz sama nila Robert De Niro ug Bruce Springsteen.
Gipahugtan usab ang seguridad sa mga otoridad, ug adunay pipila ka mga indibidwal nga gidakop sa Los Angeles human sa pagsulay sa pag-atake sa mga otoridad.
Gipahigayon usab ang susamang mga protesta sa ubang nasud sama sa Paris, London, ug Lisbon.
Nasayran nga mas dako ang turnout sa karong protesta kung itandi sa “No Kings” protest nga gipahigayon niadtong Oktubre sa miaging tuig.
