Gipadayag sa mga lider sa trucking industry nga posible nilang isaka hangtod 50 porsiyento ang singil sa pagbiyahe sa mga cargo tungod sa nagpadayon nga pagsaka sa ilahang mga galastuhon sa operasyon.
Sumala ni Mary Zapata, pangulo sa Confederation of Truckers Association of the Philippines, nga kon mosaka ngadto sa P90 ang presyo sa kada litro sa petrolyo, mapugos ang mga trucker nga mopataas usab sa ilahang rate sa mga kliyente.
Dugang pa niini, dako kaayo ang epekto sa presyo sa petrolyo sa operasyon sa trucking industry tungod kay kini ang nag-unang gasto sa pagpadagan sa mga trak, gawas sa petrolyo gilauman usab nga mosaka ang presyo sa ubang kinahanglanon sa operasyon sama sa spare parts, ligid, ug lubricating oil nga gigamit sa mga trak.
Sa kasamtangan, matud pa ni Zapata nga bisan pa kon modesisyon ang gobyerno nga suspendihon ang excise tax sa lana, dili gihapon kini igo aron mapugngan ang posibleng pagtaas sa ilahang singil.
Lakip sa gihisgutan sa sektor, ang posibilidad nga mosunod usab ang pagtaas sa presyo sa ubang serbisyo sa transportasyon kon magpadayon ang pagsaka sa presyo sa petrolyo sa merkado.
Sumala sa taho, ang maong sitwasyon mahimong mosangpot usab sa pagtaas sa presyo sa pipila ka mga produkto tungod sa mas mahal nga gasto sa paghatod sa mga kargamento ngadto sa nagkadaiyang mga lugar sa nasud.
