DAVAO CITY – Gipapaalerto karon sa Davao City Disaster Risk Reduction and Management Office ang tanang Dabawenyo sa epekto sa Tropical Storm Kabayan sugod karong adlawa.
Dinhi sa Davao City, nagpakanaog na og suspension order si Mayor Sebastian Duterte sa tanang klase ug akibidad sa mga pampubliko ug pribadong tulunghaan sa tanang lebel sa tibuok dakbayan, ingon man trabaho sa mga opisina sa gobyerno gawas sa mga opisina nga lauman nga magpahigayon og safety and security, health, social services and disaster and emergency response services panahon sa pagsulod sa bagyo.
Subay sa taho sa Bombo Weather Center as of 5am, ulahing nasigpatan ang Tropical Storm Kabayan sa 195 kilometers east of Davao City. Gikatakdang mag-landfall karong buntaga ang Tropical Cyclone sa mga kabaybayunan sa Surigao del Sur ug Davao Oriental.
Dinhi sa rehiyon, gipataas ang Signal no. 2 ang northern portion sa Davao Oriental partikular na sa Boston ug Cateel.
Samtang Signal no. 1 ang central portion sa Davao Oriental lakip na ang Baganga, Manay, Caraga, Tarragona, Lupon ug Banay-banay.
Nasa signal no. 1 sab ang Davao de Oro, Davao del Norte ug Davao City.
