DAVAO CITY – Padayon pa nga gisuhid sa tropa sa kagamhanan ang mga dapit sa Barangay Cabuyoan, Mabini, Compostela Valley Province diin unang miulbo ang pangsangka sa tropa sa kagamhann ug mga rebeldeng New People’s Army (NPA) 12:20 sa kaadlawon niadtong Hulyo 16, 2018.
Kini human nga gipa-ulanan ug mga bala sa mga rebelde ang Cabuyoan Detachment, nga iya sa 6th Compostela Valley Province Civilian Active Auxiliary Company, ug sa 72 Infantry Battalion Philippine Army, sa Barangay Cabuyoan, Mabini, Compostela Valley Province.
Anaa ubos sa pagpanguna sa usa ka Corporal Raul Baldestoy sa Philippine Army ang detachment nga girakrakan sa napulo ka mga gituohang sakop sa Militia ng Bayan (MB) gikan sa cluster B, Guerrilla Front Two (GF2), Southern Regional Command Two (SRC2), Southern Mindanao Regional Committee (SMRC) nga miposisyon sa Habagatang Kasadpan nga direksyon kapin 50 metros ang gilay-on gikan sa perimeter sa CAA detachment.
Apan nakamatikod ang tropa sa kagamhanan ug mibalos sa pagrapido tumong ngadto sa nahimutangan sa mga suspek. Milungtad ang panagsangka sulod sa tulo ka minuto, diin human niini dali nga miikyas ang mga suspek.
Wala’y gikatala nga patay sa bahin sa tropa sa kagamhanan, apan wala pa madetermina ang sa bahin sa mga rebelde.
