Gibalewala lamang ni Partylist Rep. Terry Ridon ang gihimo ni Atty. Israelito Torreon aron pugngan ang impeachment proceedings sa House of Representatives of the Philippines batok kang VP Sara Duterte-Carpio.
Sumala ni Ridon, walay direktang kalambigitan si Torreon ug ang iyahang law firm sa isyu sa impeachment, busa wala kini gahum nga dal-on ang kaso sa Supreme Court of the Philippines.
Gibutyag pa nini nga dili usab kabahin sa defense team ni VP Sara ang nangayo og temporary restraining order (TRO), mao nga gamay ra ang posibilidad nga tagdon kini sa mga mahistrado.
Dugang pa niya, bisan pa magpasaka og petisyon ang grupo isip taxpayer, dili gihapon kini kwalipikado tungod kay dili man paggamit sa pondo sa gobyerno ang gireklamo.
Tungod niini, nagtuo si Ridon nga walay kapasidad ang reklamo aron mapugngan ang impeachment, nga gikan pa sa sinugdanan sakop sa katungdanan sa Kongreso ug dili sa korte.
Sa karon, giatubang na sa House justice committee ang impeachment case aron susihon kung adunay probable cause aron nga isaka ang isyu sa Senado isip Impeachment Court.
