Gibarugan sa mga organizer sa “Trillion Peso March” nga dili politika ang sentro sa ilang protest rally karong adlawa, kundili ang susi nga tumong niini ang pakigbatok batok sa sistemikong korapsyon sa gobyerno.
Sumala ni Kiko Aquino Dee, usa sa mga organizer ug apo nila Cory ug Ninoy Aquino, dili sila pro o kontra bisan kinsa nga opisyal.
Matud ni Dee, ang labing gipanawagan sa rally mao ang transparency, pagbalik sa kwarta sa katawhan, pagtahod sa 1987 Constitution, ug pagbatok sa political dynasties.
Iyang gibutyag nga sa pagkakaron, puro ra mga kontratista ug kanhing engineers sa Department of Public Works and Highways ang nadakpan ug napriso.
Gidugang pa niya nga gusto nilang makita nga apil maaresto ang mga tag-as nga opisyal nga nalambigit sa korapsyon aron makita sa publiko nga walay ‘sacred cows’ sa imbestigasyon.
Giklaro usab ni Dee nga katong mga magdala og placard nga naghanyo sa pagkanaog ni Presidente Marcos, dili hilabtan basta dili makahatag og kasamok.
Apan kon dunay mosulay og pagdasig sa extra-constitutional actions sama sa pag-awhag sa military withdrawal of support, klaro niining gibutyag nga bawal kini ilawom sa ilahang guidelines.
