Gipahibalo ni kanhi Senador Antonio “Sonny” Trillanes IV nga iyang gipahunong na ang mga kaso batok sa upat ka kanhi sundalo human nila iatras ang ilang unang mga affidavit ug mga alegasyon batok kaniya, sa International Criminal Court (ICC), ug sa ubang personalidad.
Matod ni Trillanes, isip kanhi sundalo, nakasabot siya sa kahimtang sa upat ka kanhi sundalo nga giingong napahimuslan sa mga tawong adunay daotang politikal nga tumong tungod sa ilang kakulang sa panginabuhian.
Matod pa niini, naglaum siya nga mahimong dakong leksyon ang ilang naagian aron dili na mausab ang susamang kahimtang sa umaabot.
Dugang pa, nagtuo siya nga adunay uban pang kanhi sundalo nga hangtod karon nalimbongan gihapon sa parehas nga mga grupo.
Gibutyag ni Trillanes nga ang iyang desisyon usa ka paagi aron ipakita ang iyang pagpakabana sa mga kaubang sundalo nga nag-atubang og grabeng pagsulay.
Naglaum usab siya nga sa umaabot, maablihan ang hunahuna sa ubang kanhi sundalo ug makita ang tinuod nga tumong sa luyo sa maong mga pagpanglimbong.
