Nasikop ang usa ka 47-anyos nga tricycle driver nga nailhan sa alyas “Butoy” sa usa ka drug buy-bust operation nga gihimo sa Buhangin Police Station 5 sa Dela Peña Village, Cabantian Road, Barangay Cabantian, Davao City, sa kaadlawon niadtong Abril 29, 2025.
Base sa imbestigasyon, unang napalitan ang suspetsado og usa ka sachet sa gituohang shabu, ug sa ulahi napalitan pa usab og dugang 3 ka sachets nga gibanabana nagkantidad og P1,064,200. Si “Butoy”, residente sa Barangay 31-D, Davao City, giila nga Top 5 sa listahan sa mga personalidad nga nalambigit sa illegal nga droga sa siyudad.
Sa pagkakaron, gipansak na sa prisohan ang maong suspetsado ug mag-atubang og kasong paglapas sa Republic Act 9165 o ang Comprehensive Dangerous Drugs Act of 2002. Padayon usab ang imbestigasyon sa kapulisan aron mailhan ang lain pang kaubanan niini sa operasyon sa ilegal nga droga.
