Daghang pasahero ang na-stranded sa nagkalain-laing bahin sa Metro Manila kaganihang buntag, Marso 26, 2026, tungod sa duha ka adlaw nga transport strike nga gilusad sa grupong MANIBELA batok sa padayon nga pagsaka sa presyo sa lana.
Sumala sa National Capital Region Police Office (NCRPO), adunay mga commuter nga mipadayon gihapon sa pagbyahe bisan pa sa pahimangno sa paghunong sa pagpamasada, nga hinungdan sa pagdaghan sa mga naapektuhan.
Natala ang mga stranded nga pasahero sa mga lugar sama sa Manila, Quezon City, Pasig, Taguig, Parañaque, Las Piñas, ug Malabon.
Bisan paman niini, gibutayg sa kapulisan nga walay natalang kagubot sa mga lugar diin gihimo ang protesta.
Mikuyog sa strike ang nagkalain-laing sektor sa transportasyon lakip ang jeepney drivers, bus operators, TNVS, motorcycle taxis, ug UV Express.
Usa sa mga nag-unang lugar nga nagtigom ang mga nagprotesta gipahigayon sa Aurora Boulevard Cubao sa Quezon City, nga gipangunahan sa No To Oil Price Hike Coalition.
Gipanawagan sa mga grupo ang pagtangtang sa VAT ug excise tax sa mga produktong petrolyo, pagpakunhod sa presyo sa petrolyo ngadto sa ₱55 matag litro, ug pagbaliwala sa Oil Deregulation Law.
Lakip usab sa ilahang gipangayo ang dugang-pamasahe, ₱1,200 nga family living wage, ug nasyunalisasyon sa industriya sa lana aron mapakunhod ang presyo niini.
Samtang kabahin usab niini, nag-andam ang nagkalain-laing ahensya sa gobyerno og libreng sakay aron matabangan ang mga apektadong commuters.
