DAVAO CITY – Nipadayag og pagkadismaya ang President sa usa sa mga transport group dinhi sa syudad sa Davao gumikan sa pagsaka sa presyo sa lana.
Sa pakighinabi sa Bombo Radyo Davao kang Maning Duran, President sa SEMDOCC, gikabutyag niini nga wala na silay mahimo sa pagsaka sa presyo sa lana og nabalaka usab sila sa hangyo nga 15 pesos nga usbaw sa pletihan.
Kini gumikan maapektohan usab niini ang mga pasahero, busa mas labing maayo matod pa nga mahatag na ang fuel discount alang sa mga driver. Bisan paman nga dunay pagduha duha nga mag demand og fare hike apan gipaklaro ni Duran nga dili niini ma kwestyun ang iyang mga kaubanang drivers gumikan sa kamahal sa gasolina.
Gani og aduna matod pay hearing nga pagahimoon alang sa fare increase, ila matod pang pangayoon ang 15 pesos, sama sa demand sa ubang transport group nga increase sa plitehan.
Gipadayag usab sa nahisgutan nga dili igo ang subsidiya nga gihanyag sa panggamhanan og kinahanglan matod pa kini tun-an og maayo aron mahatag ngadto sa mga mas labing nanginahanglan nga mga drivers.
Sa pikas bahin gi release na sa Department og Budget and Management ang 2.5-billion pesos nga first tranche sa fuel subsidy karong bulanan diin laumang magahinan og tag 6,500 ang matag usa sa 377,443 beneficiaries.
Pero dili pa tino kung kanus-a kini hingpit nga madawat sa mga PUV drivers.
Padayon pa usab ang pagpang apod apod sa LTFRB XI og Pantawid Pasada Program cards diin sa kasamtangan gilugwayan hangtod Marso 18, 2022 ang deadline sa pag-release sa PPP cards processing forms nga maoy gamiton sa pag avail sa fuel subsidy program sa DOTr.
