DAVAO CITY – Sa lakang nga maseguro ang food securtity sa dakbayan sa Davao, magpahigayon ang Davao City Agriculturist Office ug training alang sa mga mag-uuma nga buot mananom ug magpatubo ug mais.
Sa nahimong pakighinabi kang City Agriculturist’s Office Head Edgardo Haspe, gikanayon niyang ang mga plano sa dakbayan sa pagpausbaw sa produksiyon sa pagkaon nagpasalig ug igong tabang sa tanang mag-uuma.
Ang malamboon nga merkado sa mais, nga sa pagkakaron nagdani sa mga mag-uuma nga mananom og cash crop tungod sa taas nga presyo niini, gihatagan og partikular nga pagtagad sa kagamhanan sa dakbayan. Ang CAGRO Head niingon nga ang ilang buhatan nagtakda ug training programs ug uban pang tabang alang sa mga mag-uuma sa mais sa dakbayan.
Sugyot karun sa ahensya nga maghatag ug training assistance alang sa mga mag-uuma aron hatagan ug haum nga kaalam sa matang sa corn-farming technology.
Gawas sa naglungtad nga pundok sa mga mag-uuma sa mais, ang CAGRO sa pagkakaron nagpaabot sa pagsaka sa gidaghanon sa mga mag-uuma sa mais ug mga lugar sa mais sa siyudad.
Ang kanhing kadaot nga gipahinabo sa fusarium wilt disease sa mga plantasyon sa saging sa dakbayan nakadasig sa daghang mag-uuma nga modangop sa pag-uma sa mais; usa ka pagbalhin nga gidawat sa opisina. Kasamtangang nagapud-apud karon ug mga mananap nga Trichogramma alang sa mga corn farmers isip pamugsa sa mga parasitikong naghatag ug kadaot sa mga tanom nga mais.
Anaa sa kapin 5,000 na ag ihap sa mga corn farmers sa syudad ug gilaumang musaka pa kini sa musunod pang mga bulan.
BY BOMBO LJ FLORENDO
