DAVAO CITY – Gipasalig sa mga personahe sa Treasurer’s Office sa lungsod sa Kiblawan nga dili maapektohan ang ilang trabaho bisan pa man nga nasunog ang ilang buhatan kagahapong adlawa.
Kahinumduman nga problema sa linya sa kuryente ang gitudlong hinungdan sa pagkasunog sa buhatan diin sa kapin 600 libo ang natalang danyos.
Una ng gibutyag ni David Miralles ang firemarshall sa nahisgutan nga lalawigan nga pasado alas siete sa buntag nagsugod ang kalayo ug maayo na lamang nga aduna nay mga empleyado nga nagduty hinungdan nga daling nakatawag sa mga sakop sa kabomberohan.
Nasayran nga adunay mga computer ug printer ang wala na-ibot sulod sa buhatan nga maoy hinungdan sa pag-overheat ug pag-ulbo sa kalayo.
Nagpahimangno na lamang ang kabomberohan nga kanunay nga magbinantayon ug dili kalimtan ang pag-ibot sa mga nakasaksak nga appliances ingon man likayan ang mga substandard nga mga butang nga mamahimong tinubdan sa sunog.
