Hugot nga gikondena sa Department of Health (DOH) ang padayon ug walay hunong nga paglingla nga marketing strategy nga gigamit sa mga kompanya sa vape products.
Tungod niini, gisugyot sa DOH ang usa ka total ban, o hingpit nga pagpugong, sa paggamit ug pagbaligya sa vape sa tibuok nasud isip proteksyon sa kahimsog sa publiko, ilabi na sa kabatan-onan.
Sumala sa DOH, ang vape naglangkob og lain-laing kemikal nga grabe ka delikado sa kahimsog sa bisan kinsa nga mogamit niini.
Dugang pa, nakadani kini sa kabataan tungod sa daghang kolor nga packaging ug sa lain-laing flavor nga ilang gi-offer.
Base sa datos gikan sa 2019 Global Youth Tobacco Survey, makapaguol nga usa sa matag pito ka kabataang Pilipino nga edad 13 hangtod 15 anyos ang nakagamit na sa vape.
Makapaguol usab nga natala ang unang kaso sa kamatayon sa Pilipinas nga direkta nga gilambigit sa duha ka tuig nga paggamit sa vape.
Kini usa ka klaro nga indikasyon sa peligro nga dala sa vape sa kahimsog.
Gipasabot sa DOH nga ang padayon nga paggamit sa vape, sama sa sigarilyo, makahatag og grabe nga problema sa kahimsog, lakip na ang cardiovascular disease, lain-laing klase sa cancer, ug seryoso nga sakit sa baga.
Sa pagkakaron, nagpadayon ang DOH Health Promotion Bureau sa paghatag og edukasyon sa mga komunidad, eskwelahan, ug mga lugar sa trabaho.
